බ්‍රිතාන්‍යයේ ජෝන් හැනට් සාමිවරයා ශ්‍රී ලංකාව සඳහා බ්‍රිතාන්‍යයේ නව වෙළඳ නියෝජිතයා ලෙස පත් කර ඇත.
වෙළඳපොළ ප්‍රවේශය ප්‍රවර්ධනය කිරීම සහ දෙරටටම අන්‍යෝන්‍ය ආර්ථික වර්ධනයක් ලබාදීම වෙනුවෙන් බ්‍රිතාන්‍යයේ ව්‍යාපාර සඳහා අවස්ථා නිර්මාණය කිරීමට ශ්‍රී ලංකාවේ සහ බ්‍රිතාන්‍යයේ ජ්‍යෙෂ්ඨ කොටස්කරුවන් සමඟ සම්බන්ධවීමෙන් හැනට් සාමිවරයා බ්‍රිතාන්‍යයේ වෙළඳ සහ ආයෝජන ප්‍රවර්ධන අරමුණු සඳහා සහාය වනු ඇතැයි පැවැසේ.
මෙම පත්වීම පිළිබඳව අදහස් දක්වමින් මෙරට බ්‍රිතාන්‍ය මහකොමසාරිස් ඇන්ඩෘ පැට්‍රික් පවසා ඇත්තේ, “ශ්‍රී ලංකාව සඳහා එක්සත් රාජධානියේ වෙළඳ නියෝජිතයා ලෙස හැනට් සාමිවරයා පත්කිරීම ගැන මම සතුටු වෙනවා. ඔහුගේ සහාය ඇතිව, අධ්‍යාපනය, මූල්‍ය සහ වෘත්තීය සේවා, පුනර්ජනනීය බලශක්තිය සහ තොරතුරු තාක්ෂණ සක්‍රීය සේවා යන අපගේ ප්‍රමුඛ අංශ හරහා ද්විපාර්ශ්වික වෙළඳ සබඳතා තවදුරටත් ශක්තිමත් කිරීමට මම බලාපොරොත්තු වනවා. මෙය එක්සත් රාජධානිය සහ ශ්‍රී ලංකාව යන දෙඅංශයේම ආර්ථික වර්ධනයට සහ සමෘද්ධිය ඇති කිරීමට උපකාරී වෙනවා. නුදුරු අනාගතයේ දී ඔහු ශ්‍රී ලංකාවට පිළිගැනීමට මම බලාපොරොත්තු වෙනවා” යනුවෙනි.
මේ අතර සිය පත්වීම පිළිබඳව අදහස් දක්වමින් හැනට් සාමිවරයා පවසා ඇත්තේ, ශ්‍රී ලංකාව සඳහා එක්සත් රාජධානියේ වෙළඳ නියෝජිතයා ලෙස පත්කිරීමට ලැබීම පිළිබඳව තමන් සතුටට පත්වන බවයි.
”මෙය වැදගත් කාර්යභාරයක් වන අතර, මම ශ්‍රී ලංකාව සමඟ එක්සත් රාජධානියේ වෙළඳ සබඳතාවයේ ප්‍රමුඛයා වන අතර, අපගේ රටවල් දෙකටම දිගුකාලීන ප්‍රතිලාභ උත්පාදනය කිරීම සඳහා වෙළඳපොලේ ඇති අවස්ථාවන්ගෙන් ප්‍රයෝජන ගැනීමට එක්සත් රාජධානියේ ව්‍යාපාරවලට උපකාර කරන්න බලාපොරොත්තු වෙනවා. බ්‍රිතාන්‍ය සහ ශ්‍රී ලංකාව අතර දැනටමත් පවතින ශක්තිමත් වෙළඳ සබඳතා ගොඩනඟා ගැනීමට මම බලාපොරොත්තු වෙනවා” ඔහු පවසා ඇත.
ජෝන් හැනට් සාමිවරයා බ්‍රිතාන්‍ය වෘත්තීය සමිති සාමාජිකයකු සහ කම්කරුවන්ගේ අයිතීන් වෙනුවෙන් පෙනීසිටින දිගු වෘත්තීය සමිති ක්‍රියාකරුවකු ලෙස සැළකේ.
ප්‍රතිචාරයක් ලබාදෙන්න