ජනමාධ්‍යවේදී ලසන්ත වික්‍රමතුංග ඝාතනයේ සැකකරුවන් තිදෙනෙකු නිදහස් කිරීමට ගත් තීරණය ජනමාධ්‍ය සහ සිවිල් අයිතිවාසිකම් ක්‍රියාකාරීන්ගෙන් දැඩි විවේචනයට ලක්ව ඇති අතර, එය අපරාධකරුවන් ආරක්ෂා කිරීමේ උත්සාහයක් බව ඔවුහු චෝදනා කරති.
ජනවාරි 27 වන දින නීතිපති පාරින්ද රණසිංහ අපරාධ විමර්ශන දෙපාර්තමේන්තුවේ (CID) අධ්‍යක්ෂවරයාට දැනුම්දී ඇත්තේ, නඩුවේ ප්‍රධාන සැකකරුවන් තිදෙනකුට එරෙහිව නීතිමය කටයුතු අඛණ්ඩව සිදුනොවන බවයි.
ලිපියට අනුව, හිටපු හමුදා බුද්ධි නිලධාරී ප්‍රේම් ආනන්ද උදලගම, ගල්කිස්ස අපරාධ අංශයේ හිටපු ස්ථානාධිපති උප පොලිස් පරීක්ෂක තිස්සසිරි සුගතපාල සහ හිටපු නියෝජ්‍ය පොලිස්පති ප්‍රසන්න නානායක්කාර නිදහස් කළ හැකි බව දන්වා ඇත.
නීතිපති රණසිංහ වගවීම සහතික කිරීමට අපොහොසත් වූ බවට අයිතිවාසිකම් කණ්ඩායම් චෝදනා කර ඇති අතර, ඝාතනය කරන ලද ලසන්ත වික්‍රමතුංගට යුක්තිය ඉල්ලා ඇත.
මේ අතර, තරුණ ජනමාධ්‍යවේදීන්ගේ සංගමය විසින් සංවිධානය කරන ලද විරෝධතාවක් බ්‍රහස්පතින්දා දහවල් 12 ට නීතිපති දෙපාර්තමේන්තුව ඉදිරිපිට පැවැත්වීමට නියමිතය.
“අපරාධකරුවන් රකින නීතිපති ගෙදර යනු !” “ලසන්තගෙ නඩුවේ සැකකරුවන් නිදහස් කළ ආකාරය හෙළිකරනු !” මැයෙන් යුතුව මෙම විරෝධතාව පැවැත්වේ.
ප්‍රතිචාරයක් ලබාදෙන්න