වංචා දූෂණ හා ඥාති සංග්‍රහ නිසා මේ රටට පසුගිය කාලයේ වැනසුනු බවත් දැන් යම් පිළිවෙළකට රට ගොඩනැඟෙමින් පවතින බවත් මල්වතු පාර්ශ්වයේ අනුනායක පූජ්‍ය දිඹුල්කුඹුරේ විමලධම්ම නාහිමියෝ පවසති.
මාලිමාව බලයට පැමිණියහොත් මාස යහකට වඩා ආණ්ඩු නොකරන බවට ඇතැමුන් ප්‍රකාශ කළ මුත් එසේ සිදු නොවුණු බවත් වංචා, දූෂණ හා අකටයුතුකම්වලින් තොරව පාලනය ගෙන යන්නේ නම් ජනතා ආශීර්වාදය සැමදා පවතින බවත් උන්වහන්සේ කීහ.
අනුනාහිමියෝ එසේ පැවසුවේ මහනුවර මහා නගර සභාවේ අභිනව නගරාධිපති චන්ද්‍රසිරි විජේනායක මහතා පෙරේදා (12) මල්වතු මහා විහාරයට ගොස් උන්වහන්සේ බැහැදැක ආශීර්වාද ලබාගත් අවස්ථාවේදී ය. පසුගිය කාලයේ රට බරපතළ ගැටලු රැසකට මුහුණ දුන්නේ පාලකයින් ගත් වැරදි තීන්දු නිසා බවත් ඥාති සංග්‍රහ මෙන්ම වංචා, දූෂණ, සොරකම් ඇතුළු කරුණු ගණනාවක් මෙයට බලපෑ බවත් අනුනාහිමියෝ පැවසූහ.
වත්මන් පාලනය යටතේ වංචා, දූෂණ, සොරකම් සිදු නොවනු ඇතැයි ජනතාව විශ්වාස කරන බවත් එම විශ්වාසය තහවුරු වනසේ කටයුතු කිරීම මහජන නියෝජිතයන් සියලු දෙනාගේ වගකීම බවත් විමලධම්ම නාහිමියෝ ප්‍රකාශ කළහ.
මහනුවර නගරයේ අනවසර වෙළෙඳාම මෙන්ම අවිධිමත් ඉදි කිරීම් බහුලව දක්නට ලැබෙන බවත් මේවා සම්බන්ධයෙන් පක්ෂ, පාට භේදයෙන් තොරව නීතිය ක්‍රියාත්මක විය යුතුව තිබෙන බවත් අනුනාහිමියෝ පැවසූහ.
ශ්‍රී දළදා මාලිගාව, මල්වතු අස්ගිරි උභය මහා විහාරය, පේරාදෙණිය විශ්වවිද්‍යාලය හා උද්භිද උද්‍යානය ඇතුළු පූජනීය මෙන්ම සුවිශේෂි ස්ථානවලින් සමන්විත මහනුවර ලෝක උරුම නගරය විධිමත් ලෙස සංවර්ධනය විය යුතුව ඇතැයි ද එහි දී නගර සභාවට විශාල කාර්යභාරයක් පැවරෙන බවත් උන්වහන්සේ කීහ.
මෙහි දී අදහස් දැක්වූ නගරාධිපති චන්ද්‍රසිරි විජේනායක මහතා ජනතාව පැවති පාලනය වෙනස්කර මාලිමාවට බලය ලබා දුන්නේ වංචාව හා දූෂණය පිටුදැක යහපත් පාලනයක් වෙනුවෙන් බවත් එම ජනතා අපේක්ෂා ඉටු කිරීමට මහජන නියෝජිතයින් සියලු දෙනා ඇපකැප වන බවත් පැවසුවේය.
මෙම අවස්ථාවට මහනුවර මහා නගර සභාවේ නියෝජ්‍ය නගරාධිපති රුවන් කුමාර මහතා ඇතුළු ජාතික ජන බලවේගයේ මන්ත්‍රීවරු පිරිසක් ද සහභාගි වූහ.
ප්‍රතිචාරයක් ලබාදෙන්න