Channel4.lk

Sri Lankan Latest Sinhala News Portal

74 වන නිදහස් දිනයට සමගාමීව යුද හමුදාවේ 8,514 කට උසස්වීම්

By News Team on February 4th, 2022 in Local

74 වන ජාතික නිදහස් දිනයට සමගාමීව යුද හමුදාවේ නිලධාරීන් සහ සෙසු නිලයන් 8514 කට සේනාධිනායක ජනාධිපති ගෝඨාභය රාජපක්ෂ මහතා විසින් උසස්වීම් පිරිනමා තිබෙනවා.

ඒ අනුව යුද හමුදා නිලධාරීන් 480 දෙනෙකු සහ සෙසු නිලයන් 8,034 කට මීළග නිලය දක්වා උසස්වීම් හිමිවන බවයි ශ්‍රී ලංකා යුධ හමුදාව නිවේදනය කලේ.

මේ අනුව ජ්‍යෙෂ්ඨ බ්‍රිගේඩියර්වරුන් 07 දෙනෙකු මේජර් ජනරාල් නිලයටත්, කර්නල්වරුන් 16 දෙනෙකු බ්‍රිගේඩියර් නිලයටත්, ලුතිතන් කර්නල්වරුන් 36 ක් කර්නල් නිලයටත් උසස් වනු ඇති.

මේජර්වරුන් 50 දෙනෙකු ලුතිතන් කර්නල් නිලයටත්, කපිතාන්වරුන් 207 දෙනෙකු මේජර් නිලයටත්, ලුතිතන්වරුන් 94 දෙනෙකු කපිතාන් නිලයට සහ දෙවන ලුතිතන්වරුන් 70 දෙනෙකු ලුතිතන් නිලයටත් යනාදී වශයෙන් යුද හමුදාවේ නිලධාරින් 480 දෙනාට උසස්වීම් ලබා දී තිබෙනවා.

2019 වසරේ සිට මේ දක්වා යුද හමුදා නිලධාරින් 4341 දෙනෙකු සහ සෙසු නිලයින් 86 දහස් 741 දෙනෙකුට නිල උසස්වීම් ලබා දී ඇති බවද යුද හමුදාව වැඩිදුරටත් සඳහන් කළා.